عدد الرسائل : 1674 العمر : 46 تاريخ التسجيل : 16/08/2007
موضوع: حوار بين ملاك وشيطان 27/7/2008, 10:04 am
مــلاك وشيطـــان
الشيطان : آه فيه شاب خارج من المسجد أهو .. إزاي فلت من إيدي ؟! أنا لازم أروح له وأبوظ كل الخير اللي عمله النهاردة
الملاك : حرام عليك .. ده شكله شاب مستقيم سيبه في حاله وما تفسدوش
الشيطان : لا أنا لازم أفوز بيه ، أنا لازم أغويه ، أنا لازم أضمه للي أغوتهم النهاردة .. أومال حروح أقول إيه للكبير النهاردة ؟
لازم أكون أشطر وأنشط شيطان في الشياطين كلهم
تمر في الشارع فتاة بجوار الشاب
يوسوس الشيطان للشاب قائلاً : بص يا ابن آدم المُزة اللي معدية دي إيه ده هو فيه جمال كده ؟! ما تيجي تتلحلح وتعاكسها كمان عشان تثبت رجولتك قدام الشباب اللي قاعدين على القهوة هناك ده فيهم حمادة جارك ، لازم تثبت إنك واد ملحلح ومانتاش خيبة زي ما بيقولوا عليك
الشاب : آه فعلاً ، أنا لازم أوريهم إن أنا زيي زيهم وما حدش منهم أحسن مني
الشيطان : يا سلام أدينا حنكسب أهو
الملاك : لا يا ابن آدم ما توديش نفسك في داهية إنت مش عارف إن المعاكسة حرام ؟!
إنت مش عارف إن مجردة النظرة لوحدة غريبة عنك حرام إنت ما سمعتش رسولك الكريم صلى الله عليه وسلم وهو بيقول :
' إن العين تزني وزناها النظر ، والأذن تزني وزناها الاستماع , واليد تزني وزناها البطش ، والرجل تزني وزناها المشي ، واللسان يزني وزناه الكلام ، والقلب يهوى ويتمنى , والفرج يصدق ذلك أو يكذبه '
وبعدين ليه تضيع صلاتك ؟! ده أنت لسه مصلي في المسجد يعني جماعة والرسول صلى الله عليه وسلم قال :
' صلاة الجماعة تعدل صلاة الفذ بسبعٍ وعشرين درجة '
يعني صلاة الجماعة تساوي 27 صلاة ليك لوحدك عايز تضيع أجر 27 صلاة ؟! إنت ما تعرفش إن ' من لم تنهه صلاته عن الفحشاء والمنكر فلا صلاة له '
الشاب : صدق رسول الله صلى الله عليه وسلم . لا أنا مش لازم أبص للبنت دي ، أنا مش لازم أضيع صلاتي ومش مهم بقى نظرة حمادة وأصحابه ليا هما يعني حينفعوني يوم القيامة لما أقف بين يدي الله عز وجل ويحاسبني ؟! والله يومها ماحدش حينفعني ده يوم صعب وما حدش حينفع حد
الملاك : صح .. تمام يا ابن آدم مش لازم تمشي ورا شهواتك ، لازم تقاوم عشان تفوز برضا ربك
الشيطان : أخ ... طلعت آوت بس معلش أهو كان ناوي برضه .. يعني خد الذنب خد الذنب
الملاك : مين قالك ؟ إنت ما تعرفش إن ربك كريم ؟ إذا نوى ابن آدم القيام بالسيئة وما عملهاش كتبت له حسنة أما لو عملها كتبت له سيئة واحدة .
الشيطان : فعلاً معاك حق .. خسرت أنا المرة دي
يمر الشاب على رجل فقير يسأل الله
فيقول له الملاك ناصحاً : يااه .. ده راجل غلبان أوي قاعد في الشارع يسأل الله . ومش لاقي بيت يأويه ، ولا لبس كويس يكسيه ، ولا حتى اللقمة اللي تغذيه .
يا سلام لو تتبرع يا ابن آدم باللي تقدر عليه . إنت ما تعرفش إن ' صدقة السر تطفيء غضب الرب ' ؟ يعني لو كنت عملت أي ذنب وربنا غضب عليك الصدقة تطفي الغضب ده و ' الحسنات يذهبن السيئات '
الشاب : آه فعلاً أنا لازم أتصدق بأي شيء معايا
الشيطان : تتصدق بإيه ؟ وإنت حيلتك حاجة يا مسكين ؟ ده أنت حالك يصعب على الكافر ، ده أنت شرابك مقطوع ، وكل اللي في جيبك 2 جنيه ، حتديله إيه ؟ ويتفضل معاك إيه ؟ وحتعمل بيهم إيــــــــــــــــــــــه ؟
أديك عرفت مكانه ، هو بيقعد هنا كل يوم لما يبقى معاك فلوس ابقى تعالى واديله .
الشاب : فعلاً .. إن شاء الله لما يبقى معايا فلوس حبقى آجي أديله
الشيطان : آه .. أيوة كده .. أديني كسبت
الملاك : غلطان يا شيطان مين قالك إنك كسبت ؟! إنت ما تعرفش إن ابن آدم إذا نوى إنه يعمل حسنة وما عملهاش تتكتب له حسنة وإن عملها تتكتب له عشر حسنات وإنت حتعرف منين يا غلبان ؟! ما أنت ما سمعتش رسول الله محمد صلى الله عليه وسلم وهو بيقول عن رب العزة عز وجل :
' قال الله عز وجل : إذا همَّ عبدي بحسنة ولم يعملها كتبتها حسنة ، فإن عملها كتبتها عشر حسنات إلى سبعمائة ضعف ، وإذا هم بسيئة ولم يعملها لم أكتبها عليه ، فإن عملها كتبتها سيئة واحدة '
الشيطان : يعني برضه خسرت ! كده 2 / 0 يا ملاك بس أنا مش بيأس ، ومش بستسلم ، إنت ما تعرفنيش ولا إيه ؟ ده أنا إبليس
يرى الشاب امرأة عجوز تريد أن تعبر الطريق
يقول الملاك : روح خد بإيدها وساعدها ، عديها ينوبك فيها ثواب
يهِم الشاب لمساعدة المرأة
فيقول الشيطان : لأ ، استنى .. رايح فين ؟ إنت مش عندك درس دلوقتي ، إنت كده حتتأخر على الدرس ، وإنت السنة دي ثانوية عامة ولازم تنجح وما تضيعش أي دقيقة من وقتك
الشاب : آه فعلاً أنا كده حتأخر على الدرس
الملاك : يا ابن آدم ده أنت مش حتاخد دقيقة .. بقى تستخسر في نفسك دقيقة تزود بيها حسناتك من غير أي تعب أو مجهود
الشاب : بس الدرس ..
الملاك : ماجتش على دقيقة . وبعدين : ' إن الله لا يضيع أجر من أحسن عملاً ' وبعدين افرض إنك روحت الدرس في ميعادك ، مش يمكن الأستاذ هو اللي يتأخر ؟ مش يمكن يلغي الدرس النهاردة ؟ ترجع تندم ! يا ابن آدم توكل على الله ، ده يوم القيامة صاحب الحسنة يقول يا ريتني كترت ، وصاحب السيئة يقول يا ريتني ما عملت .
الشاب : معاك حق .. أنا لازم أساعدها
ويساعد الشاب المرأة العجوز على عبور الشارع ثم يمضي في طريقه إلى الدرس
الشيطان : لااااا .. دي مش طريقة دي بقى الشاب ده ياخد 12 حسنة على الأقل وأنا واقف مش عارف أعمل أي حاجة ؟! أنا لازم أفضل وراه لحد ما ياخد 120 سيئة بدل الــ 12 حسنة دول .
ويفضل الشيطان ورا الشاب عاوز يوقعه في المعصية ، ويفضل الملاك برضه وراه عاوز ينجيه منها
27/7/2008, 10:04 am
